Rreth 200 të rinj aplikojnë për kadetë të FSK-së, interesohen edhe komunitetet

Ministria e Mbrojtjes e Republikës së Kosovës shpalli më datë 23 maj 2019, zyrtarisht konkursin publik për rekrutimin e kadetëve–për studime në Qendrën për Studime Universitare të Forcës së Sigurisë të Kosovës, si dhe për studime në shtetet partnere, si në Republikën e Turqisë, Republikën Federale të Gjermanisë, Republikën e Kroacisë dhe në Republikën e Maqedonisë Veriore.

Konkursi u shpall sipas Planit të Veprimit 2019 të Ministrisë së Mbrojtjes. Bazuar në këtë plan do të zhvillohet edhe procesi i shqyrtimit, filtrimit dhe përzgjedhjes së kadetëve të rinj që do të pranohen në Qendrën Universitare të FSK-së dhe në akademitë ushtarake të shteteve partnere, shkruan Indeksonline.      

Pas mbylljes së konkursit (13 qershor), në Ministrinë e Mbrojtjes thonë se ka pasur interesim të të rinjve për t’u bërë pjesë e FSK-së.

Në një përgjigje për Indeksonline, në Ministrinë e Mbrojtjes kanë bërë të ditur se kandiduan qindra persona.

“Konkursi i Ministrisë së Mbrojtjes për pranimin e kadetëve të FSK-së ka qenë i hapur nga data: 23.05.2019 deri 13.06.2019, gjatë kësaj kohe kemi pranuar  aplikacione të kandidatëve ( rreth 200 aplikacione),  dhe ka pasur gjithashtu interesim të kënaqshëm edhe nga gjinia femërore dhe komunitetet joshumicë”, thuhet në përgjigjen e ministrisë.​

Vlen të theksohet se kriteret e përgjithshme për kadetë të FSK-së janë si në vijim: të jetë shtetas i Republikës së Kosovës; të këtë përfunduar shkollën e mesme; të jetë i moshës 18-21 vjeç; të ketë zotësi të plotë për të vepruar; të zotërojë aftësitë e nevojshme shëndetësore e fizike për vendin e shërbimit, si dhe të mos jetë i dënuar për vepra penale me vendim të formës së prerë.

Procedurat e shqyrtimit, filtrimit dhe përzgjedhjes do të jenë: shqyrtimi fillestar i aplikacioneve; testi i aftësive; testi fizik; intervista me shkrim dhe me gojë; testi mjekësor; trajnimi; verifikimi; emërimi si dhe e drejta e ankesës.      

Dokumentet e kërkuara për aplikim sipas konkursit janë: diploma (dëshmi) e shkollimeve të përfunduara; certifikata, mirënjohje (nëse posedon); certifikata e lindjes (jo më e  vjetër se 6 muaj); certifikata e shtetësisë; vërtetimi nga gjykata që nuk është nën hetime apo  i ndjekur penalisht; kopja e  letërnjoftimit apo pasaportës si dhe dy fotografi të formatit (5 cm x 5 cm).          

Shtetasit e Republikës së Kosovës, të cilët konkurrojnë, mund të pranohen në Forcën e Sigurisë së Kosovës pasi t’i kenë plotësuar kërkesat dhe kriteret e përgjithshme të përzgjedhjes.

·         Konkursi i rekrutimit për kadetë do të jetë i hapur prej 23 maj 2019 deri më 13 qershor 2019.

 Pranimi në FSK konfirmohet pas përfundimit të testimeve.

 Formularët për aplikim do të jenë në dispozicion në të gjitha kazermat e FSK-së, si dhe në  ueb-faqen e Ministrisë së Mbrojtjes https://mod.rks-gov.net(ëëë.mksf-rks.org) apo ëëë.rks-gov.net/mfsk, ku do të publikohet edhe konkursi. Formularët duhet të dorëzohen personalisht në të gjitha kazermat e FSK-së, në çdo ditë pune nga ora 09:00-15:00 deri në afatin e fundit për konkurrim.

 Ministria e Mbrojtjes u shërben të gjithë qytetarëve të Kosovës dhe mirëpret aplikacione të femrave dhe meshkujve për kadetë të FSK-së, pa dallim nga përkatësia e tyre etnike. /Indeksonline/