11:05 / E Premte, 27 Korrik 2018

Aktakuzë për bashkim kriminal të vrasjes së rëndë

Departamenti i Krimeve të Rënda i Prokurorisë Themelore të Pejës ka ngritur aktakuzë kundër të pandehurve: A.S., M.S. dhe B.R., për shkak të dyshimit të bazuar se duke vepruar në bashkim kriminal kanë kryer vepër penale të “vrasjes së rëndë”.

Sipas njoftimit të prokurorisë i pandehuri B.R. me qëllim të hakmarrjes së paskrupullt ka porositur të pandehurin Gj.P. që së bashku me të pandehurit A.S. dhe M.S. ta kryejnë vrasjen e viktimës F.Gj., duke iu premtuar shumën prej 100.000 frangash zvicerane, transmeton Indeksonline.

Të pandehurit duke vepruar sipas kësaj marrëveshjeje, në mënyrë dinake dhe për fitim të dobisë pasurore për vete, kanë shfrytëzuar gjendjen ekonomike të viktimës, të cilin e kishin joshur me substanca narkotike dhe e kishin vënë në pritë, duke e ftuar që ta marrë narkotikun, siç i kishte premtuar i pandehuri A.S., me ç’rast i njëjti përcillet nga i pandehuri Gj.P. dhe sapo arrin viktima te ura që i lidh fshatin Llukë të Komunës së Deçanit me atë të Prapaqanit, i pandehuri M.S. i zë pritën dhe shtie me armë automatike në drejtim të viktimës, duke i shkaktuar vdekjen, ndërsa më pas i pandehuri A.S. shkon dhe e merr të pandehurin M.S. për t’u arratisur deri ditën kur janë arrestuar.

Të pandehurit kanë realizuar me veprimet e tyre figurën e veprës penale të përshkruar sikurse më lart, me ç’rast prokurori i propozoi gjykatës që të njëjtit të shpallen fajtorë dhe të dënohen sipas ligjit./Indeksonline/

Mos i humb