E eliminoi Gjilanin në çerekfinale, Gani Sejdiu ia dedikon fitoren gruas së tij të ndjerë
Skuadra e Drenicës e ka mposhtur Gjilanin në ndeshjen çerekfinale, të zhvilluar sot në stadiumin “Bajram Aliu” në Skenderaj.
Drenicakët mposhtën, Gjilanin me rezultat 2:1, të gjitha këto gola u shënuan në lojën shtesë, pasi që 90 minutat e rregullt nuk dhanë fitues.
Ishte Hasan Hyseni, ai i cili shënoi golin e epërsisë fillestare në shtesën e parë, ndërsa golin e dytë e realizoi Genc Hamiti.
Golin e nderit për skuadrën mysafire e shënoi, Fiton Hajdari një minutë para se të përfundonte ndeshja.
Në deklaratën pas ndeshjes, trajneri i Drenicës Gani Sejdiu ia dedikoi fitoren gruas së tij të ndjerë e cila vdiq në fillim të këtij viti, shkruan Indeksonline.
I pyetur se kujt ia dedikon këtë fitore ai u përgjigj: “Qytetit të Skënderajt dhe sidomos bashkëshortes e cila nuk është më në këtë jetë. E kam pas fanse të madhe gjatë karrierës time” – u përgjigj Sejdiu.
Drenica bashkë me Prishtinën janë dy gjysmëfinalistët e parë të Kupës së Kosovës/Indeksonline/