Griffin i jashtëzakonshëm në fitoren e Detroit Pistons, fitojnë edhe New Orleans e Denver
Denver po kalon një moment të mirë në kampionat, duke korrur sot suksesin e katërt radhazi.
Skuadra e Nuggets mundi 126-112 Sacramenton, në një takim të dominuar nga basketbollistët e Denverit.
8 lojtarë të ekipit vendës realizuan mbi 10 pikë, çka tregon për forcën e kolektivitetit të skuadrës së Denver, ku më të mirët ishin Murray me 19 pikë e Harris me 18.
E pamposhtur në kampionat edhe skuadra e New Orleans, me 3 fitore në po kaq takime të luajtura.
Pelicans fituan 116-109 ndaj Clippers, ndeshje që u përmbys në favor të miqve në pjesën e dytë.
Për Clippers, dyshja Harris-Gallinari realizoi 50 pikë, por që s’mjaftuan për të evituar humbjen, ndërsa për miqtë u dallua Davis me 34 pikë e 13 rebaund.
Pas kohës shtesë fiton ekipi i Detroit, që mundi 133-132 Philadelphia, ndeshje emocionuese dhe dramatike deri në sekondën e fundit.
Një ndeshje fantastike e Blake Griffin, që realizoi 50 pikë e 14 rebaund, duke i bërë të pavlefshme 33 pikët e 11 rebaund të Embiid për vendasit.
Për Detroitin ky ishte suksesi i 3-të me radhë, ende i pamposhtur këtë sezon.
NBA – Rezultatet e sotme
Philadelphia – Detroit, 132-133
Clippers – New Orleans, 109-116
Denver – Sacramento, 126-112