Ish-gjyqtari Simmons do të dëshmojë para deputetëve për shkeljet e rënda të EULEX-it

Malcolm Simmons, ish-president i gjykatësve të EULEX-it do të dëshmojë para Komisionit për legjislacion dhe imunitete.

Vendimi është marrë sot në mbledhjen e këtij komisioni, teksa propozimi ka kaluar me shtatë vota pro, shkruan lajmi.net.

Simmonsi, do të dëshmojë aty në lidhje me pretendimet e tij për shkeljet e rënda që janë bërë përgjatë disa vjetëve nga misioni i EULEX-it.

Megjithatë, e pajtimit nuk ishte LDK-ja. Kryetari i këtij komisionit, Shkëmb Manaj, tha se Lidhja Demokratike e Kosovës nuk e mbështet dëshminë e Simmonsit.

“Ky është qëndrimi zyrtar i LDK-së, që ne nuk e mbështesim dëshminë e z. Simmons, edhe para asnjë trupe të Kuvendit, ky ka qenë mision i BE-së nëse duhet të dëshmojë diku duhet të dëshmojë para Parlamentit Evropian”, ka thënë ai.

Ish-gjyqtari i misionit ndërkombëtar të EULEX-it, Malcolm Simmons, ua ka dërguar një letër deputetëve të Komisionit për legjislacion, më 16 korrik, ku ka kërkuar që të raportonte lidhur me disa informacione.

E në lidhje me këtë ka reaguar EULEX-i, duke thënë se nëse kjo është e vërteët nuk do të jetë hera e parë që  Simmonsi ka bërë përpjekje që ta paraqiste versionin e tij, të njëanshëm dhe të pavërtetuar të shkeljeve të pretenduara gjatë kohës sa ai ishte gjyqtar në misionin e BE-së për sundim ligji./IndeksOnline/