Këto janë fitimet e arkëtuara nga Juventusi që u kualifikua në çerekfinale të Championsit

Të mërkurën në “Wembley”, Juventus ia doli me sukses që të kualifikohej në raundin tjetër, pavarësisht vështirësive ndaj një rivali të fortë si Tottenham, me një përmbysje që i dhuroi çerekfinalet e UEFA Champions League.

Por, larg entuziazmit dhe me laps e letër në dorë, ekspertët financiarë të futbollit kanë nisur të bëjnë edhe llogaritë.

Suksesi në Londër kundër Spursave që kishin kaluar të parët në avantazh, mes bonuseve të UEFA-s, marketingut dhe shumë sponsorizimeve, ka shtuar 12 milionë euro të tjera në arkat e bardhezinjve. Këto numra do të shtohen me miliona të tjerë në rast se Roma do të braktisë Europën e eliminuar nga Shakhtar, raporton TCH.

Që kur ka nisur edicioni në turneun më të lavdishëm, “Zonja e Vjetër” mund të llogarisë fitime 94.6 milionë euro.

Shpërblimet e shtuara të UEFA-s për pjesëmarrjen në Ligën e Kampioneve këtë sezon llogariten edhe në bazë të ndeshjeve të zhvilluara të Juves, krahasuar me ekipet e tjera italiane.

Deri më tani, bardhezinjtë kanë fituar më shumë nga përballja me Barcelonën dhe pas katalanasve, vjen Tottenham.

Sipas llogarive të ekspertëve, ndeshja e radhës në çerekfinale do t’i sjellë Juventusit të paktën 3.5 milionë euro të tjera e nëse Juve kualifikohet, këtyre i shtohet edhe bonusi prej 7.5 milionësh i UEFA-s për gjysmëfinalet.