Kurti uron Pashkët: Vëllazëria fetare është bekim për shqiptarët
I pari i Lëvizjes Vetëvendosje, Albin Kurt ka uruar besimtarët e krishterë për Pashkët.
Kurti tha se Pashka është festë e ngarkuar me domethënien e jetës e cila nuk përfundon, por forcohet, kur jepet për të shpëtuar të tjerët.
Tutje ai tha se besimi i fortë se të gjithë jemi krijuar të barabartë, përbën bazën e qëndrimit se pabarazia e shtypja janë të padrejta, transmeton Indeksonline.
Postimi i plotë:
Urime të gjithë besimtarëve të krishterë që kremtojnë sot Pashkën!
Pashka është festë e ngarkuar me domethënien e jetës e cila nuk përfundon, por forcohet, kur jepet për të shpëtuar të tjerët. Pra, është një mesazh altruist, nga i cili mund të nxirren mësime të vyeshme në një kohë kur cinizmi e nihilizmi përpiqen të bëhen dominantë. Festat tradicionale të bashkësive tona, të cilat kahmoti i kemi festuar bashkë, na dëshmojnë se dashuria dhe vëllazërimi mes njerëzve jo vetëm që është i mundshëm, por është vetë qëllimësia e njerëzimit. Besimi i fortë se të gjithë jemi krijuar të barabartë, përbën bazën e qëndrimit se pabarazia e shtypja janë të padrejta.
Për ne shqiptarët kjo aksiomë e barazisë është mirëkuptuar historikisht si vëllazëri ndërfetare. Në këtë kuptim vëllazëria fetare është bekim për shqiptarët dhe bekim i shqiptarëve për njërin-tjetrin nën dritën e vëllazërisë.
Qofshi të lumtur e të gëzuar në këtë ditë feste!
Urime për Pashkën, të gjithë besimtarëve!