Kurti uron SHBA-të: Mirënjohës e falenderues për rolin e pazëvendësueshëm në arritjet tona

Albin Kurti ka uruar Ditën e Pavarësisë së SHBA-ve.

Ai thotë së është mirënjohës e falenderues për rolin e pazëvendësueshëm në arritjet tona, shkruan Indeksonline.

“Shteti i Kosovës dhe kombi shqiptar i bashkohen sot festës së popullit dhe institucioneve të ShBA-ve”, tha Kurti.

Postimi i plotë:

Urime 4 Korrikun!

Para 244 vitesh u shpall pavarësia e ShBA-ve nga Anglia perandorake. U bashkuan 13 koloni për t’u çliruar duke shënuar në histori kalimin nga monarkia e sundimi në republikë dhe demokraci.

Barazia dhe të drejtat e njeriut siç i mendojmë sot e kanë burimin nga ajo kohë që nuk rreshti së frymëzuari popuj e lëvizje anembanë globit për liri e drejtësi. Deklarata e Pavarësisë së ShBA-ve është pararendëse e Deklaratës Universale për të Drejtat e Njeriut. Revolucioni amerikan është pararendës i anti-kolonializmit në botë.

Mirënjohës e falenderues për rolin e pazëvendësueshëm në arritjet tona, shteti i Kosovës dhe kombi shqiptar i bashkohen sot festës së popullit dhe institucioneve të ShBA-ve.