Kuvajti në përpjekje për të shpëtuar nga varreza më e madhe e gomave në botë
Kuvajti po bën përpjekje të mëdha për të shpëtuar nga varreza më e madhe e gomave në botë, për të cilën shkencëtarët kanë frikë se mund të krijojë rreziqe mjedisore dhe shëndetësore.
Varreza, e cila gjendet në zonën Arhiya, pesë kilometra në jug të qytetit Jahra, përmban 50 milionë goma, sipas deklaratave të mëparshme të aktivistit kuvajtian Abdullah Al-Bunyan.
Gomat e hedhura janë grumbulluar atje gjatë dy dekadave të fundit.
Kohët e fundit, një zjarr i madh në Rrugën Salmi në jug u vu nën kontroll pasi ekipet e zjarrfikësve punuan shumë për të izoluar zjarrin nga pjesa tjetër e gomave dhe e kufizuan atë në një sipërfaqe prej 200 metrash katrorë.
Kriza e gomave në Arhiya u regjistrua për herë të parë në prill 2012 kur një zjarr i madh shpërtheu tek gomat, duke tërhequr vëmendjen e botës për varrezën.
Zjarri i gomave në prill 2012 u pasua nga një zjarr tjetër në nëntor 2019, që u desh shumë kohë për t’u shuar.
Në tetor 2020, një zjarr tjetër shkaktoi humbje të mëdha materiale.
Masat për shpëtimin nga gomat
Qeveria e Kuvajtit po merr masa të ndryshme për të frenuar ndikimet e rrezikshme të këtyre gomave të hedhura.
Marsin e kaluar, Administrata e Përgjithshme e Doganave miratoi një kërkesë për një kompani që të eksportojë 5 milionë goma të përdorura në zonën Arhiya brenda nëntë muajve.
Ajo gjithashtu filloi krijimin e pesë fabrikave për prerjen, riciklimin dhe eksportimin e këtyre gomave.
Më parë, drejtori i përgjithshëm i Autoritetit Publik të Kuvajtit për Industrinë, Abdul Karim Taqi, ka njoftuar se 48 milionë nga 57 milionë goma janë prerë në Arhiya.
Qeveria gjithashtu po i zhvendos gomat e mbetura në një vend të ri në Salmi, të caktuar për mbledhjen e gomave të dëmtuara dhe të përdorura.
Një anëtar i Këshillit Bashkiak të Kuvajtit, Hassan Kamal, tha për Anadolu Agency (AA) se “një sipërfaqe prej 2 milionë metrash katrorë është ndarë për krijimin e fabrikave të riciklimit të gomave në Salmi”.
“Zona e caktuar do të përfshijë rreth 52 uzina për riciklimin e gomave, letrës dhe plastikës”, shtoi ai.
Megjithatë, Hammoud Al-Anzi, kreu i Komitetit të Qytetit Jahra në Këshillin Bashkiak, tha për AA se përpjekjet e bëra deri më tani nuk përputhen me “sfidën që paraqet numri i madh i gomave”.
Ai i bëri thirrje qeverisë të përfshijë vullnetarë për të ndihmuar në shpëtimin nga gomat dhe të ftojë kompanitë kryesore të transportit dhe kompanitë e pajisjeve të rënda që të kontribuojnë në kuadër të përgjegjësisë sociale për të përshpejtuar ritmin e zhvendosjes së gomave.