Renault pushon nga puna 800 inxhinierë për t’i mbijetuar konkurrencës së kinezëve

Prodhuesi francez i makinave Renault planifikon të shkurtojë 800 vende pune në inxhinieri në Francë deri në fund të vitit 2027 për ta bërë organizatën e saj më efikase dhe për të konkurruar më mirë me rivalët kinezë.

Prodhuesit kinezë e kanë trefishuar pjesën e tyre të tregut në Evropë gjatë dy viteve të fundit, me produkte teknologjikisht të përparuara dhe çmime shumë konkurruese, tha Philippe Brunet , drejtori i teknologjisë i Renault, raporton Reuters .
“Të gjithë prodhuesit e tjerë po vuajnë, koreanët, japonezët dhe evropianët e tjerë, përfshirë edhe ne”, shtoi ai. “Ne duhet të jemi në gjendje të konkurrojmë kundër kësaj.”

Me 5,500 punonjës, Franca përbën gjysmën e stafit global të inxhinierisë së Renault. Në mesin e prillit, Renault njoftoi planet për të shkurtuar fuqinë punëtore të përgjithshme të inxhinierisë me 15% deri në 20% deri në fund të vitit 2027, me 800 shkurtime vendesh pune si pjesë e masës.

Kompania pret që plani i saj i transformimit të miratohet nga sindikatat në korrik dhe të zbatohet nga shtatori. Ai do të përfshijë gjithashtu rikualifikimin e 2,500 punonjësve dhe midis 150 dhe 200 punësimeve të reja, kryesisht për të punuar në elektrifikimin e automjeteve, softuerët dhe inteligjencën artificiale.

Brunet njoftoi gjithashtu një riorganizim të organizatës dhe metodave të punës për të përmirësuar operacionet dhe për t’u bërë më të shkathët në garën kundër konkurrentëve kinezë, të cilët kanë vendosur një standard të ri duke zhvilluar modele në vetëm dy vjet, krahasuar me katër deri në pesë vjet që kërkohen tradicionalisht në industri./Indeksonline/