Kuvendi, jofunksional

Kuvendi i Kosovës që nga konstituimi e deri më tash ka arritur të miratojë vetëm pesë ligje, prej të cilave tri marrëveshje ndërkombëtare me karakter financiar dhe dy projektligje që janë plotësim-ndryshim i Ligjit për Buxhetin e vitit të kaluar, si dhe buxheti për vitin 2018.

Përveç opozitës, të cilët thonë se Kuvendi nuk ka punuar sa duhet, një gjë të tillë e kanë pohuar edhe deputetë të pozitës të cilët për gazetën “Zëri” kanë deklaruar se miratimi i vetëm pesë ligjeve nuk është i mjaftueshëm.

Ata kanë akuzuar kryetarin e Kuvendit Kadri Veselin për thirrjen e vetëm një numri të vogël të seancave, pasi ka shumë çështje e ligje që duhen miratuar.

Në anën tjetër monitorues të punës së Kuvendit të Kosovës kanë vlerësuar se Kuvendi gjatë kësaj kohe ka performuar dobët.  Ata thonë se gjatë kësaj periudhe nuk është miratuar asnjë projektligj që do të ndikonte në përmirësimin e jetës së qytetarëve.