Mblidhet LDK, diskutohen zhvillimet aktuale politike në vend

Nën udhëheqjen e liderit të LDK-së, Isa Mustafa, kryesia e kësaj partie është mbledhur sot për të diskutuar mbi zhvillimet aktuale politike në vend, në kuadër të përgatitjeve për mbajtjen e Këshillit të Përgjithshëm të LDK-së.

Lidhja Demokratike e Kosovës i ka bërë publike qëndrimet e saj për dialogun ndërmjet Republikës së Kosovës dhe Republikës së Serbisë.

“Këto qëndrime, që konsistojnë në legjitimitet para dialogut, do të diskutohen në takimin e ardhshëm të Këshillit të Përgjithshëm, si organ më i lartë i LDK-së, ndërmjet dy kuvendeve.LDK është e bindur se vendi duhet të shkojë në zgjedhje sa më parë, sepse është e dëmshme të qeveriset nga një pakicë me interesa klienteliste. Për këtë arsye do të fillojë organizimin dhe mobilizimin e anëtarësisë dhe qytetarëve për zgjedhje të parakohshme të përgjithshme. LDK, si parti e qendrës së djathtë, do tu ofrojë qytetarëve program evropian të qeverisjes dhe perspektivë evropiane. LDK sheh interes të veçantë që të përmirësohet qeverisja edhe në nivel lokal, prandaj do të angazhohet që pushteti lokal, sikurse edhe ai qendror të punojë në të mirë të qytetarëve dhe të shtetit të Kosovës”, thuhet në komunikatën për media.

Ttutje është thënë se janë këto tema, për të cilat po bëhen përgatitjet të përcaktohen orientimet bazë në Këshillin e Përgjithshëm të LDK-së  që do të mbahet në fund të kësaj jave./Indeksonline/