MSh mbështet me 30 mijë euro Florent Hoxhën

Ministria e Shëndetësisë njofton se ka ndarë 30 mijë euro për Florent Hoxhën, studentin që është diagnostifikuar me leukeminë akute.

“Me qëllim të eliminimit të keqinformimit dhe keqpërdorimit nga palë të ndryshme të rasteve që aplikojnë për trajtim jashtë vendit për sëmundjet që nuk mund të trajtohen në tërësi në Kosovë, Ministria e Shëndetësisë informon publikun se, bazuar në legjislacionin në fuqi dhe dokumentacionin mjekësor, të prezantuar me rastin e aplikimit, ka mbështetur në vlerë prej 30 mijë  mijë eurove trajtimin mjekësor jashtë vendit të pacientit F.H., i prekur nga Leukemia akute”, thuhet në një njoftim të MSH-së.

I njëjti, në MSh ka aplikuar për trajtim mjekësor jashtë vendit më 6 dhjetor ndërsa miratimi i trajtimit jashtë vendit dhe fletëzotimi për ta realizuar trajtimin i është lëshuar pas dy dite, më 8 dhjetor .

Shuma e ndarë është konform kritereve që i parasheh Udhëzimi Administrativ 03/2017 Trajtimi Mjekësor Jashtë Institucioneve Shëndetësore Publike.

Krahas kësaj, MSh ka ofruar për pacientin në fjalë edhe opsionin e trajtimit falas në Republikën e Turqisë, sipas Marrëveshjes së bashkëpunimit të nënshkruar midis dy shteteve, me të cilën Turqia mbulon falas trajtimin e 100 pacientëve kosovarë në vit, në spitalet publike të këtij shteti.

MSh, gjithsesi, respekton të drejtën e pacientit për të zgjedhur spitalin për mjekim.