Mustafa: Marrëveshja për energjinë është e njëjta me atë të vitit 2013-2015
Ish kryeministri i Kosovës, Isa Mustafa ka deklaruar se marrëveshja e nënshkruar për energjinë nga kryenegociatori Besnik Bislimi në Bruksel është e njëjta marrëveshje e arritur në vitin 2013 dhe vazhduar në vitin 2015.
“Tash kjo marrëveshje nuk ka asnjë dallim nga ajo marrëveshje, sepse thirret në preambulën e vitit 2013 dhe 2015 dhe përcakton afatet e implementimit të atyre marrëveshjeve apo udhëzuesi siç po i thonë”, tha Mustafa në A23 në ATV.
Marrëveshja ka qëllim të ushtrohet sovraniteti i fushës së energjisë dhe parametrat janë caktuar që në 2013 dhe 2015-të, por sipas tij ka qenë politikë e LVV-së ta kundërshtoj atëherë, e ta pranojë tani në pushtet.
Në Bruksel, Kosova dhe Serbia miratuan udhërrëfyesin për implementimin e marrëveshjeve të energjisë në veri të Kosovës. Dy shtetet miratuan udhërrëfyesin për zbatimin e marrëveshjes për energjinë në veri. Marrëveshja ishte arritur qysh më 2013, por s’ishte zbatuar. Me marrëveshje parashihet që Zyra e Rregullatorit të Energjisë të lëshojë licencë furnizimi te “Elektroseveri”, i cili do të merret me operimin në katër komunat në veri.