Nga mbeturinat në kryeqytet do të prodhohet energji dhe kubëza për shtrimin e rrugëve

Drejtori i Administratës në Komunën e Prishtinës, Muhedin Nushi, ka takuar përfaqësuesit e kompanisë “Ekowat” nga Polonia, të cilët janë shprehur të interesuar të investojnë në projektin e ri për menaxhimin e mbeturinave.

Presidenti i kësaj kompanie, Adam Kaminski, ka prezantuar modelin e zbatuar në Ukrainë për grumbullimin dhe klasifikimin e mbeturinave, djegien e tyre dhe mënyrën e prodhimit të energjisë elektrike nga to. Ai bën të ditur se mbetjet e fundit pas djegies, kjo kompani i shfrytëzon atje për prodhimin e tullave dhe për shtrimin e rrugëve.

Krijimi i një impianti të tillë do të sillte shumë favore për Komunën e Prishtinës dhe Kosovën, dhe do të rezultonte me qytet shumë më të pastër dhe me krijim të vendeve të reja të punës. Po ashtu, i gjithë sistemi i këtij përpunimi është i digjitalizuar dhe eliminon “varrezat e mbeturinave”.