‘Njihuni me Republikën e Kosovës’

Majlinda Kelmendi është ngritur sërish në piedestalet më të mëdha të kontinentit tonë.

Kampionia Olimpike fitoi medaljen e artë në garat e xhudos, që po mbahen në kuadër të Lojërave Evropiane Minsk 2019.

Heroina jonë mposhti në finale me Ippon kampionen e deritashme të Evropës, rusen, Natalia Kuziutina, të cilës i nxori ‘hakun’ për Distria Krasniqin, e cila kishte humbur në finalen e evropianit të kaluar nga kjo garuese.

Është kjo medalja e parë e artë në histori të Kosovës në dy pjesëmarrjet në Lojërat Evropiane, ndërsa për Majlindën është titulli i katërt i kampiones së Evropës. Garat e xhudos në Minsk shërbejnë edhe si Kampionate Evropiane.

Majlinda mposhti me ippon rusen Kuziutina dhe shihej mjaft e emocionuar. Menjëherë pasi e rrëzoi atë xhudistja jonë bën me shenjë në emblemën e flamurit të Kosovës, në vendin që nuk njohu pavarësinë e Kosovës. /IndeksOnline/