Prishtina e jashtëzakonshme në Europe Cup, “shkel” skuadrën ukrainase
Në një atmosferë të jashtëzakonshme të krijuar nga “Plisat” është zhvilluar ndeshja e FIBA Europe Cup në mes të Prishtinës dhe Cherkaski Mavpy.
Skuadra kosovare ka mposhtur atë nga Ukraina me rezultat 92-82 në një ndeshje të dominuar në përgjithësi.
Në dhjetë minutat e parë Prishtina ishte shumë e mirë duke fituar me 12 pikë epërsi, 27-15, shkruan indeksonline.
Çereku i dytë ishte më i dobëti për skuadrën kosovare por përsëri arriti të mbaj epërsinë prej 10 pikëve. Pjesa e parë përfundoi me rezultat 51-43.
Edhe çereku i tretë i takoi ukrainasve në një diferencë prej dy pikës, 19-21 por epërsia mbeti gjithnjë te vendasit.
Prishtina u “dhez” në çerekun e katërt duke e fituar atë me rezultat 22-18 për të shënuar fitoren e parë në ndeshjen e Europe Cup.
Koshashënuesi më i mirë në këtë ndeshje ishte ylli i Prishtinës, Dardan Berisha me 24 pikë.
Me këtë fitore, Prishtina është e dyta në grupin E me dy pikë aq sa ka edhe Bakken Bears ndërsa Cherkaski dhe Steaua Bucurest kanë nga një pikë.
Në ndeshjen tjetër Prishtina është mysafir i Steaua që zhvillohet me 27 tetor nga ora 18:00. /IndeksOnline/