Ten Hag: Doja që Ronaldo të qëndronte që nga momenti i parë

Erik ten Hag ka zbuluar se Cristiano Ronaldo nuk i ka thënë kurrë për dëshirën e tij për t’u larguar nga Manchester United, duke pranuar se ai nuk ndihej i respektuar nga portugezi.

Ronaldo u largua nga United me pëlqim të ndërsjellë muajin e kaluar pasi doli publikisht me zhgënjimet e tij në një intervistë të famshme me Piers Morgan, në të cilën ai foli për marrëdhënien e tij të ftohtë me Ten Hag dhe pranoi se donte të largohej nga “Old Trafford”.

Sipas Ten Hag, kjo ishte hera e parë që ai kishte dëgjuar për dëshirën e largimit të Ronaldos.

“Doja që ai të qëndronte që nga momenti i parë e deri më tani”, tha Ten Hag.

“Ai donte të largohej, ishte shumë e qartë. Dhe kur një lojtar definitivisht nuk dëshiron të jetë në këtë klub, atëherë ai duhet të largohet”.

“Intervista ishte hera e parë që ai tha se donte të largohej. Mendoj se si klub nuk mund ta pranosh këtë. Do të ketë pasoja. Për të bërë atë hap, [për të bërë intervistën] ai i dinte pasojat. Më parë nuk më kishte thënë kurrë”.

“Gjatë sezonit nuk kishte afat kalimtar të transferimeve, por deri në atë moment ai kurrë nuk më tha ‘dua të largohem’. Në verë patëm një bisedë. Ai hyri dhe tha: “Do t’ju them pas shtatë ditësh nëse dua të qëndroj”. Pastaj ai u kthye dhe tha: “Dua të qëndroj”. Deri në atë moment (intervistë) nuk kam dëgjuar asgjë”.

“Ne donim që ai të ishte pjesë e projektit tonë, [që] ai të kontribuonte në Manchester United, sepse ai është një lojtar i madh. Ai ka një histori kaq të madhe, por është në të kaluarën dhe ne duhet të shikojmë në të ardhmen”.

I pyetur nëse ndihej i pa respektuar nga Ronaldo, Ten Hag ofroi një ‘po’ të thjeshtë përpara se të argumentonte se sulmuesi nuk ishte në formë mjaft të mirë për të justifikuar ndeshjet e fillimit në “Old Trafford”.

“Kur ai është në formë të mirë, ai është një lojtar i mirë,” vazhdoi trajneri. “Dhe ai mund të na ndihmonte prapa dhe të arrinim objektivat që kemi. Kjo është mjaft e qartë. Por ai nuk ishte”.

“Më pëlqente të punoja me lojtarë të klasit botëror. Unë e di se ata mund të bëjnë një ndryshim dhe t’ju ndihmojnë të arrini objektivat tuaja. Kjo është arsyeja pse ju dëshironi të keni lojtarë të tillë në dhomën tuaj të zhveshjes”.

“Por ndodhi ajo që ndodhi. Më duhet të bëj zgjedhje rreth lojtarëve që nuk po performojnë dhe të zgjedh ekipin më të mirë”.

“Përgjegjësia ime është në favor të klubit dhe ekipit. Janë vendimet që duhet të marr. Nuk ka rëndësi se kush është personi, ka të bëjë me mënyrën se si ne performojmë tani”, përfundoi Ten Hag.