Zbulohen shtatoret e tre baballarëve të shtetit

Janë zbuluar shtatoret e tre liderëve historik, Ymer Prizreni, Avdyl Frashëri dhe Sylejman Vokshi. Shtatoret u zbuluan nga krerët delegacionit të Qeverisë së Kosovës dhe asaj të Shqipërisë.

Përfaqësues të Qeverisë së Shqipërisë po qëndrojnë në Prizren për përurimin e këtyre shtatoreve ndërsa nesër pritet të mbahet mbledhja e përbashkët e këtyre dy qeverive në Pejë, shkruan Indeksonline.

Me këtë rast presidenti i Shqipërisë, Ilir Meta u shpreh i kënaqur që ndodhet në Prizren, duke shtuar se ky muaj përkon me përvjetorë të shumta.

“Jemi pikërisht në një muaj të festave, 28 nëntorit e po ashtu edhe të alfabetit të njësuar”, tha ai.

I pranishëm në përurimin e tri shtatoreve ishte kryeministri Edi Rama, i cili u shpreh i kënaqur që ndodhet në këtë ditë sot këtu në Prizren.

Ndërsa, kryeministri i Kosovës, Ramush Haradinaj u shpreh se kjo vepër e sotme është pjesë e përgjegjësive, të vitit ndërkombëtar të Gjergj Kastriotit-Skënderbeut.

“E mira e kësaj vepre të sotme është se kush do që nuk heq dorë prej të drejtës së vet, ajo do të bëhet realitet. Në vitin mbarëkombëtar të Skënderbeut, 110-vjetorin e Kongresit të Manastirit dhe 140-vjetorin e Lidhjës së Prizrenit, në Nëntorin e Festave Kombëtare, na vijnë sërish të përjetësuar Abdyl Frashëri, Ymer Prizreni e Sylejman Vokshi. Tre prijësit që përhapen thirrjen për veprim në unitet në të gjitha anët e atdheut, porosinë e idealit të Gjergj Kastriotit për të drejtën e shqiptarëve e rizgjuan dhe e mbajtën gjallë plot një shekull e gjysmë. Shqiptarët qëndrojnë të vendosur për të drejtën e tyre të plotë, të lirë në trojet e veta dhe të bashkuar me familjen perëndimore”, tha Haradinaj.

Kurse,  kryetari i Kuvendit të Kosovës, Kadri Veseli tha se këto shtatore përjetësojnë një moment vendimtar në historinë tonë kombëtare: momentin kur këta tre burra të mëdhenj e bashkuan kombin përball rreziqeve të kohës.

Duke e konsideruar këtë ditë, të veçantë për Prizrenin dhe gjithë kombin shqiptar, Veseli tha se në mesin tonë po kthehen të përjetësuar tre baballarë të kombit, të cilët nisën rrugëtimin me idenë e lirisë dhe të shtetit kombëtar të shqiptarëve.

Por shtoi Veseli, kjo ditë nuk do ta kishte këtë hijeshi, pa një histori tjetër të veçantë të kombit tonë, e cila ndodhi këtu e 21 vjet më parë, pra ballafaqimi i parë frontal i Ushtrisë Çlirimtare të Kosovës, udhëhequr nga Komandanti Legjendar Adem Jashari, e cila për herë të parë poshtëroi në mënyrë disfatiste ushtrinë dhe policinë serbe.

“Sot ne shqiptarët kemi shtete, kemi liri, identitet e krenari, por kemi partnerë, në rrugëtimin tonë drejt integrimeve euro-atlantike. Do të vazhdojmë kështu si sot, të bashkuar, për të përkujtuar dhe lartësuar çdo herë veprat e atdhetarëve dhe baballarëve të kombit. Njëkohësisht, edhe për të dëshmuar se jemi të përgjegjshëm dhe të vëmendshëm për të gjitha sakrificat që janë bërë, si dhe për të ruajtur dhe çuar përpara amanetin e heronjve dhe martirëve të kombit. Lavdi e përjetshme heronjve të atdheut”, tha në fjalën e tij kryeparlamentari Veseli./Indeksonline/