10:17 / E Diele, 21 Janar 2018 / indeksADMonline

Anëtarë të LDK-së bëjnë homazhe para varrit të Ibrahim Rugovës (Video)

Kryesia e anëtarë të Lidhjes Demokratike të Kosovës po bëjnë homazhe para varrit të ish-presidentit Ibrahim Rugova.

Haki Rugova, Agim Veliu, Avdullah Hoti, Lutfi Haziri, Sabri Hamiti, Kujtim Shala dhe sekretari i përgjithshëm i kësaj partie, Ismet Beqiri janë  figurat e LDK-së që gjenden te varrezat në Velani të Prishtinës, raporton Indeksonline.

Ndërkohë, me ta nuk është kryetari Isa Mustafa, meqë i njëjti gjendet në Gjermani duke u trajtuar pas disa komplikimeve shëndetësore. LDK para pak minutave ka bërë me dije se gjendja e tij është përmirësuar dhe pritet shumë shpejtë të kthehet në Prishtinë.

Ndryshe, kujtojmë se Dr. Ibrahim Rugova lindi më 2 dhjetor të vitit 1944 në fshatin Cerrcë, komuna e Istogut. Më 10 janar 1945 komunistët jugosllavë ia pushkatuan të atin, Ukën dhe gjyshin Rrustë Rugovën, që kishte qenë luftëtar i njohur kundër çetave çetnike që po depërtonin në Kosovë gjatë Luftës së Dytë Botërore.

Ibrahim Rugova u zgjodh më 23 dhjetor 1989, kryetar i Lidhjes Demokratike të Kosovës, partisë së parë politike në Kosovë që sfidoi drejtpërdrejt regjimin komunist në fuqi. Rugova ka ndërruar jetë më 21 janar 2006./Indeksonline/