Gjendja alarmante në trafik, Pacolli kërkon nxjerrjen e disa vendimeve të reja

Zëvendëskryeministri i Parë dhe Ministri i Punëve të Jashtme, Behgjet Pacolli, ka zhvilluar sot një takim të jashtëzakonshëm me delegacionin e MPB-së në përbërje të ministrit të Punëve të Brendshme, Bejtush Gashi, drejtorit e Trafikut në Policinë e Republikës së Kosovës, Samedin Mehmeti dhe Drita Perezic, këshilltare e Lartë në ICITAP në Ministrinë e Punëve të Brendshme, me qëllim diskutimi mbi gjendjen alrmante në trafik, e cila këto ditë ka marrë jetën e shumë qytetarëve të Kosovës.

Për këtë qëllim Zëvendëskryeministri i Parë, Pacolli kërkoi specifikisht nxjerrjen e një vendimi nga Ministria e Punëve të Brendshme për ndërmarrjen e masave emergjente si në vijim:

· Sigurimin nga policia dhe institucionet tjera kompetente të vendpunishteve, të cilat nuk kanë të vendosura shënjezimin adekuat dhe që rrezikojnë trafikun publik;

· Identifikimin e masave administrative nga Ministria e Punëve të Brendshme, në funksion të konfiskimit të dokumenteve të udhëtimit sikurse letërnjoftimi, patën shoferi dhe pasaporta, për të gjithë ata të cilët rrezikojnë trafikun publik;

· Informimi përmes rrugëve diplomatike i shteteve përkatëse për shtetasit e Republikës së Kosovës që jetojnë në diasporë, për shkeljet e rregullave të komunikacionit, dhe në këtë kontekst, zbatimin efikas të marrëveshjeve bilaterale me këto vende;

· Bashkëpunimin me media dhe komunitet në funksion të ngritjes së vetëdijes publike;

· Varësisht nga niveli në shkelësit e ligjit në trafik, edhe mbështetjen në normat penale, përfshirë edhe arrestimin e shkelësve flagrant.

Në lidhje me masat e lartcekura, Zëvendëskryeministri i Parë dhe Ministri i Punëve të Jashtme, Pacolli kërkoi nga ministri i Punëve të Brendshme dhe Policia e Kosovës, që ta mbajnë të informuar në vazhdimësi përkitazi me aplikimin e masave të kërkuara.

Lidhur me përgatitjen e vendimit dhe masave specifike, do të informoheni gjatë ditës edhe nga Ministria e Punëve të Brendshme dhe Policia e Kosovës.