Tre të akuzuar dënohen me nga tri vite burg për substanca narkotike

Gjykata Themelore në Prishtinë – Departamenti për Krime të Rënda  ka shpallur Aktgjykimin kundër të akuzuarve A.S, A.TH dhe L.TH për veprën penale Blerja, posedimi, shitja dhe shpërndarja e paautorizuar e narkotikëve, substancave psikotrope dhe analoge nga neni 273, paragrafi 1 lidhur me nenet 31 e 281, nën paragrafi 1.9, të Kodit Penal të Republikës së Kosovës.

Të akuzuarit  A.S, A.TH dhe L.TH janë shpallur fajtor dhe janë dënuar me dënim me burgim në kohëzgjatje prej  tri  (3) vite, për secilin veç e veç dhe dënim me gjobë në shumë prej nga njëmijë (1000) €  për secilin veç e veç, transmeton Indeksonline.

Gjithasthu gjykata ka konstatuar se të akuzuarit  pas marrëveshjes paraprake, në bashkëkryerje, kanë poseduar me qëllim shitje apo shpërndarje, substancat të cilat janë shpallur me ligj si narkotik, në atë mënyrë që, me dt. 30.03.2017,  rreth orës 11:30, gjatë bastisjes , në kulmin e shtëpisë së të akuzuarit A.S, e cila ndodhet në Prishtinë, në  lagjen  “Mati 1”, policia ka gjetur dhe sekuestruar substancë narkotike të dyshuar si marihuanë, në peshë totale 57 kg., dhe 68.9 gram, e pas ekzaminimit të mostrave të substancës së dyshuar, është konstatuar se e njëjta përmban kanabis (marihuanë), me përmbajtje Tetrahidrokanabinol (THC).

Palët kanë të drejtë ankese  në Gjykatën e Apelit të Kosovës , thuhet në komunikatën për media./Indeksonline/