Eric Cantona akuzon pronarin e Manchester United për shkatërrimin e klubit
Legjenda e futbollit francez, Eric Cantona, ka sulmuar ashpër Sir Jim Ratcliffe, aksionarin e Manchester United, i cili mori kontrollin e operacioneve të futbollit të klubit nga familja Glazer shkurtin e kaluar.
Në një intervistë me DailyMail, Cantona pohoi se pronarët e rinj e kanë shkatërruar stilin e bukur dhe sulmues të futbollit që krijoi Ferguson.
Sulmuesi francez, i cili kaloi katër sezone e gjysmë te United nën drejtimin e Ferguson dhe arriti statusin e heroit të kultit midis tifozëve, zbuloi se ishte përpjekur të punonte me Ratcliffe si ambasador i klubit, por ofertat e tij u injoruan.
“Mendova se mund t’i kushtoja dy ose tre vjet klubit që më dha gjithçka, por ai nuk ishte i interesuar. Bëra gjithçka që munda dhe tani nuk ndiej asnjë faj”, vuri në dukje ish-futbollisti.
Cantona është veçanërisht kritik ndaj planeve për të ndërtuar një stadium të ri “New Trafford” në vendin e Old Trafford, me një kapacitet prej 100,000 vendesh. Francezi beson se projekte të tilla e vrasin shpirtin e klubit.
“Për mua, për shembull, Arsenali humbi shpirtin e tij kur u largua nga Highbury. Imagjinoni Liverpoolin të luajë në çdo stadium tjetër përveç Anfield – e pamundur. Nuk mendoj se United mund të luajë diku tjetër përveç Old Trafford”, tha Cantona.
Eriku theksoi se dashuria e tij për Manchester United mbetet e pandryshuar, por tani nuk është i sigurt nëse do ta zgjidhte klubin nëse do të ishte thjesht një tifoz i zakonshëm.
