Kosova i mbylli me fitore kualifikimet në Irlandën e Veriut

Kombëtarja U19 – femrat e ka mbyllur  me fitore fazën e kualifikimeve të grupit 9 për Evropianin “Skocia 2019”. Në ndeshjen e fundit, vashat tona e kanë mposhtur Estoninë, me rezultat 5:1, epilog ky i cili fillimisht u mendua se do t’i mjaftonte të përzgjedhurave të Kushtrim Munishit kualifikimin tutje si skuadra e dytë më e mirë e vendeve të treta në grupe, gjë e cila ishte konfirmuar nga delegatja e UEFA-s.

Mirëpo, disa orë pas përfundimit të ndeshjes nga selia e UEFA-s nuk është konfirmuar kualifikimi ynë dhe është bërë me dije se vetëm pas përpilimit të tabelës shtesë me skuadrat më të mira të vendeve të treta do të dihen edhe dy kombëtaret që do të kualifikohen në rrethin elitë. Në fakt, Kosova e mbylli fazën e kualifikimeve me pikë të njëjta me Irlandën e Veriut, por falë goladallimit nikoqirja e këtij grupi përfundoi në pozitën e dytë.

Paraqitja e vashave tona në ndeshjen kundër Estonisë ishte e shkëlqyeshme, duke e mbizotëruar lojën që nga fillimi e deri në fund, madje sikur të kishin pak më shumë fat, fitorja do të ishte me rezultat edhe më bindës. Kosova kaloi në epërsi në minutën e 11-të me golin e shënuar nga Flaka Asllanaj. Dy minuta më vonë Leonora Ejupi e pati një mundësi të mirë, por gjuajtja e saj shkoi mbi portë.

Në minutën e 18-të estonet i barazuan shifrat, me golin e Riin Satsi, e cila shfrytëzoi një dëbim të topit nga ana e portieres Erda Podvorica. Megjithatë, ky gol nuk e zmbrapsi dëshirën dhe vullnetin e madh të vashave tona për të ndjekur fitoren me katër gola epërsi. Reagimi i ekipit tonë erdhi shumë shpejt, kur Diellza Hyseni e riktheu epërsinë në minutën e 24-t me një gjuajtje nga krahu i majtë.

Goli i tretë për erdhi në minutën e 42-të, kur topin e dëbuar nga shtylla pas gjuajtjes së Kaltrina Biçkajt e shfrytëzoi mjaft mirë Fleta Musaj, që e plasoi topin në rrjetë për 3:1. Edhe pjesën e dytë Kombëtarja jonë e nisi me entuziazëm të madh, por nga dëshira për të shënuar sa më shpejt vashat dështuan në disa raste. Sidoqoftë, goli i katërt erdhi në minutën e 66-të, kur sulmuesja e shkathtë Flaka Asllanaj shënoi nga brendësia e zonës.

Dhjetë minuta më vonë Kaltrina Biçkaj shënoi golin e pestë, duke vulosur shifrat e kësaj ndeshjeje, 5:1. Në minutat e mbetura vashat tona krijuan edhe disa raste të mira, por në një rast golin Kaltrina Biçkajt ia mohoi shtylla, derisa në disa raste nuk ishin sa duhet të sakta para portës, transmeton IndeksOnline.

Deklaruan pas ndeshjes

Kushtrim Munishi: Jam shumë i lumtur për këtë sukses historik. Deri këtu arritëm me punën e bërë në grumbullimet e mbajtura në Prishtinë, por edhe me përkushtimin e madh të vashave këtu në Irlandën e Veriut. Vashat e merituan kualifikimin, pasi përveç me Gjermaninë që është superfuqi, në dy ndeshjet e tjera dëshmuan kualitet përballë rivaleve.

Verona Berisha: Është ndjenjë e mrekullueshme kur shënon fitore dhe sidomos kur e arrin qëllimin për t’u kualifikuar tutje. Ne sot u angazhuam maksimalisht dhe luajtëm i ekip, duke realizuar aq gola sa na duheshin. Madje, nëse do të kishim pasur pak fat epërsia do të ishte edhe më e lartë. Këtë sukses ia dedikojmë dy bashkëlojtareve tona, Florentinës dhe Valentinës, që pësuan lëndime dhe shpresojmë që shumë shpejtë do të rikthehen në fushën e lojës.

Leonora Ejupi: Kam besuar se do t’ia arrijmë qëllimit për fitore bindëse dhe tani që jemi të kualifikuara ndihem shumë krenare. Të gjitha vashat e kemi japë maksimumin dhe nuk jemi dorëzuar as pas atij goli të barazimit. E kemi ditur cili është qëllimi ynë dhe në fund ia kemi arritur. I përgëzoj të gjitha bashkëlojtaret për suksesin, sidomos dy Tinat.

Albulena Fejza: Të jesh pjesë e një suksesi të tillë është diçka e jashtëzakonshme. Jam krenare që mbroj ngjyrat e Kosovës dhe që arritëm ta dërgojmë Kombëtaren tonë në fazën e ardhshme të kualifikimeve. Kjo fitore shkon më së shumti për Florentinën dhe Valentinën./IndeksOnline/